Mikkä oon valtiopäivitten tehtävät?
Valtiopäivät päättävät laista, veroista ja valtion menoista. Net syynäävät hallitusta ja viranomhaisia ja ottavat kantaa ulkopolitiikhaan. Usseimiten valtiopäivitten päätökset perustuvat hallituksen ehotukshiin.
Lue enämpi ruottiksi:
Mikkä oon hallituksen tehtävät?
Hallitus johtaa ja ohjaa Ruottia. Se tapahtuu sillämallin ette hallitus antaa ehotuksia (proposisjuunia) valtiopäivile ja totheuttaa net päätökset joista valtiopäivilä päätethään. Siinä työssä hallitusta auttavat eri departementit ja nuin 300 valtion viranomhaista.
Lue enämpi ruottiksi:
Regeringens webbplats
Kuka saattaa antaa ehotuksia valtiopäivile?
Se oon vain hallitus, valtiopäiväeustajat ja valtiopäivitten eri orgaanit jokka saattavat antaa ehotuksia valtiopäivile. Hallituksen ehotuksia kuttuthaan proposisjuuniksi, ja valtiopäiväeustajitten ehotuksia kuttuthaan motsjuuniksi/alotheiksi. Motsjuuni oon ussein vastaehotus proposisjuuhniin.
Yksityisilä ihmisillä eli organisasjuunila oon maholisuus freistata vaikuttaa ottamalla yhtheyttä jonku valtiopäiväpuoluheen eli valtiopäiväeustajan kans.
Lue enämpi ruottiksi:
Mikä oon valiokunta/utskott ja mitä se tekkee?
Valtiopäivitten valiokunta oon jonkulainen työryhmä johon kuuluu jäseniä jokka syynäävät kaikki ehotukset jokka tehhään valtiopäivile. Valiokunta pittää sitte jättää oman ehotuksen kamarille ja sanoa mitenkä se halvaa ette kamari päättää eri kysymyksissä.
Oon olemassa 15 valiokuntaa/utskott ja jokhaisessa oon 17 valtiopäiväeustajaa. Net jakkautuvat samala laila ko valtiopäivilä, eli sen mukhaan kunka monta ääntä joka puolue sai vaalissa. Joka valiokunta vastaa erityisestä aluheesta. Koulutusvaliokunta esimerkiksi tekkee työtä ehotuksitten kans jokka koskevat kouluja.
Lue enämpi ruottiksi: